Ng’uku uko nahukanye bitewe n’ububabare mu gihe c’ibanga ry’abubatse

Tumaze imisi tubayagira ku rubuga Yaga ibijanye n’ububabare bwo mu gihe umuntu ariko ararangura amabanga y’abubatse. Abatari bake bagiye baradusabikaniriza ico biyumvira kuri ico kibazo. Umupfasoni Anita* w’imyaka 30, we yashimye kudushingira intahe ku ngorane zamushikiye. 

Urukundo rwa twe na Niseti rwatanguye mu mpera z’umwaka w’2017. Twarumvikana cane, twarakundana, ndetse tugahuriza no ku bintu bitari bike. Imigambi myinshi twarayihurizako, mbere uko imisi ihera, akaba ari ko umwe abona ko yabayeho ku bw’uwundi. 

Hagati mu mwaka w’ 2019, ni ho isango ryo kurushinga ryashika. Nabona kubana na Niseti kuzoba ari nko kuba mw’iparadizo. Yari umuhungu yisoneye, umugabo w’imigambi itomoye. Imisi nabona umengo ntiva aho iri ngo nibanire nawe.

Imbere y’Imana n’abantu turemeza icese ko tugiye kubana akaramata, mu mahirwe no mu marushwa. Uwari kunsesa ku mutima, nari nera kurusha ikanzu y’ubugeni nari nambaye. Sinzopfa nibagiye igenekerezo rya 15 Ruheshi, umusi tubana irya mbere.

Ntivyari vyoroshe

Iryo joro ryambanye rirerire. Niseti nabonye, si uwo nari nsanzwe nzi. Bwije, abashitsi barataha. Igihe c’ukwisanzura no kwishimana n’uwo twashimanye kiba kirageze. Nari niteze kandi niteguriye ko bija kuba mu burwaneza n’umwumvikano ntangere, dukina, dusokweshanya. 

Biri bugende ukundi. Bukwi na bukwi, Niseti arahindura isura. Ivy’ubugwaneza arabita. Mbona aransimbiyeko n’inguvu zitagira uko zingana, ubukoko ntangere,… Sinashobora kwemera ko Niseti nakunze ari we turi kumwe.Ariko ngira nti ni ibisanzwe, ni ukutamenya no kutamenyera. Ndamwihanganira, ndemera ndababazwa. 

Ivyabaye vyaheranye n’iryo joro. Ntaco twigeze tubiganirako. Bwarakeye, ndiremarema, ndakenyererako ndakira abashitsi baje gushika mw’irembo. Ariko, ndavye umuriro udahera narayemwo, nkaguma nsenga ngo ijoro ryigirwe inyuma. Amasengesho yanje ntiyumviwe, ijoro rya kabiri ryarakurikiye, n’irya gatu, n’irya kane, gutyo gutyo, bikama bigenda kwa kundi.

Umutima utangura gutuntura. Icambabaje kikansonga, naramubwira ko mbabara, ariko wewe ntiyigera ashaka kuvyumva. Ubwitonzi n’ubutore namubonamwo akindesha sinari nkibibona. Ntivyahereye aho. Mu nyuma, hahavuye hazamwo n’ivyo kuntuka, anturubika, kenshi yahakwa no kunkubita, Imana igakinga. Yashika umengo twashwanye, akantegeka ivyo ngira. Natora agahengwe asubiye ku kazi, akagaruka inyuma y’indwi canke zibiri. Naraburanirwa, nanje sindi bubaze canke ngo mvuge ayo ngowe. Ku mutima nti iri ni rya banga ry’abubatse bavuga. 

Aca antana n’inzu

Naramaze amezi menshi bimeze uko. Mu kwezi kwa Gitugutu, Imana irampezagira ndasama, ariko ntacahindutse. Narakumbura Niseti yandeheje. Numva umengo twoganira vyinshi, ariko ntiyari akindonkera umwanya. Igihe cose nagerageje kumuganiriza ivyerekeye ayo mabanga, yaca antukagura. 

Nari nsigaye nja mu cumba nkarira atawe ndayaha, naheza ngasohoka ntwenga. Abantu bama bambaza ngo “wamenyereye urugo ?” Nkumva umengo ni icumu rinsogose mu mutima, ariko nkitwengesha nti “ego”. 

Icagiye gusongera isibe, ubu Niseti yahavuye ahera iyo yaroye ku kazi, haheze amezi atatu ntamukubita ijisho. Nibako muri twose. Ejo bundi, nagiye numva hari muvyaranje antumyeko, ambwira ko umugabo wanje aguma yidoga, ngo naramunaniye, ntiturigera turangura amabanga y’abubatse. 

Ivyo aja kuvuga hanze, jeho ntiyigeze antega amatwi na rimwe, ngo tubiganireko. N’ubu, aguma anyemeza ko ari akazi kamutwaye. Ubu rero ibibazo vyambanye vyinshi. Ko ndi jenyene umugabo asa n’uwantanye n’inzu, uwo nibungenze nzomushira hehe ? Nzomurera gute? Naho bitaragaragara, bisa n’uko nahukanye.

*: yahinduwe izina