Twariyandagaje inyuma y’itorwa rya “Miss Burundi 2022”

Bakivuga ko ari we yatsinze, hari abaciye batangura kwiyamiriza itorwa rya Ngaruko Kelly. Imyidogo iba myinshi ku mbuga zitandukanye. Ivyo vyari ibisanzwe, nta wushimwa na bose. Yamara hari ibintu  vyantangaje, birambabaza, bituma nibaza nimba Abarundi tudakwiye kwisuzuma tukisubirako.

Gushira aho intahe ishize, biracatugoye

Si ibanga. Mu mahiganwa nk’aya, haba hariho abafasha abahiganwa imyiyamamazo. Ubu ho haje ubuhinga bwa none, amasanamu yabo arimwo ibirungo aranyuragiranwa ku mbuga koraniro. Ariko igihe kigeze, ntihatsinda bose. Haravamwo abashimwa bakarusha abandi; kimwe gusa abatari bake batwarwa na ya masanamu bakumva ko hakwiye gutsinda Juru rya kurwa*.

Arik nk’uko tubizi, ayo mahiganwa si ubwiza bukora gusa. Abo bigeme baba bafise n’imigambi. Gusa n’ayo kw’iteke vyonyene ntibiba bikwiye. Ni naco gituma hari umugwi uba ujejwe no kuraba abafise n’ imigambi myiza.  Nk’uko Roland Rugero, umwe mu bari bagize uwo mugwi yabimenyesheje, bane kuri batanu bahurije kuri Ngaruko mu kibanza ca mbere.

Twebwe rero, twihishije inyuma ya ngendanwa zacu, kwemera ivyavuye muri ayo mahitamwo biratugora, riwe na rimwe tugashira isoni. Hari n’abazana insiguro nk’ibiturire vyatanzwe ariko ukabona ko ata vyemeza bafise ari kutemera aho intahe ishize. Iyo ngendo yibonekeje cane si iyo gusasira indava na mba.

Akagera k’amoko karacaturerembamwo

Mu majambo yavuzwe hirya no hino, hari aberekanye ko akagera k’amoko kakihari muri bamwebamwe. Akavuze wa muririmvyi, “aho ubona Ikirundi kiragoye”. Hari abasobeka mu majambo ku mbuga koraniro imvugo zifobetse, e mama ngo “hakurikijwe amasezerano y’i  Arusha” abandi bati: “ubwoko bunaka ni buhimbarwe ko hatowe uwabo”.

Amajambo nk’ayo ni inkorabara. Ni bande bazi ubwoko bw’urya mwigeme ? Ivyo si bimwe vyadukwegera akarambaraye muri kahise aho naka twamufata nk’uwacu canke uwutari uwacu ? Ko Ngaruko afise umugambi wo kuzofasha imigambi y’urwaruka, azofasha aravye intara canke ubwoko ? Habe na mba ! Uko ni kwa kwihenda kudutuma twibagira ko turi abarundi imbere yo kuba muri iyo mice: intara, ubwoko, n’imiryango.

Imbuga koraniro: uburozi

Muri iyi misi ya none, gushikiriza ivyiyumviro vyoroshe cane ku bw’ubuhinga, twari dukwiye kuraba imvugo dukoresha, no mu kwerekana ico twagaye. Abarundi barayamaze bati: “Ijambo rigukunze rikuguma mu nda”. Muri iyi misi ibiri iheze, hari amajambo nabonye yari akwiye kuguma mu nda z’abayavuze kuko ata kintu co kwubaka urwaruka na kimwe cayarangwamwo. Imvugo zibiba urwanko canke zityoza umuntu sizo zituma iciyumviro cacu kigira uburemere. Habe na mba !

Muri iyi misi, twareruye. Twarashize isoni twongera turenyaguza. Ikibabaje tweruriye imbere y’urwaruka twari dukwiye kwigisha ubutwari, ukunywana, iterambere n’uguca ubwenge. Urwo rwaruka rwaraye rutowe canke n’uruzotorwa mu nyuma, rwaraye rubonye ko hari iyindi ndwara igihugu kikirwaye. Ese mu migambi yabo bokwongeramwo uwo kuyirandurana n’imizi.