#YouthImpulse : ng’ibi ivyo kwitondera kugira dutere intambwe

Amafaranga y’amarundi imiriyaridi 40 ni yo agiye guhabwa urwaruka, mu ntumbero yo kurwunganira mu kwitunganiriza imigambi. Ayo aje yiyongera ku miriyoni 10 urwaruka rusanzwe ruhabwa mu ma koperative “Sangwe” yo ku mitumba. N’ubwo izo ngingo ari nziza cane, hari ibikwiye kwitonderwa kugira ayo mafaranga ntaze ahere nk’ifu y’imijira.

Ayo mafaranga yaraye yemewe na Reta mvyeyi, mu mwiherero uheruka guhuza urwaruka rw’incabwenge n’umukuru w’igihugu. Izo mboneza z’urwaruka zahimirijwe kutama zizeye ngo Reta izobakwiza akazi. Bemerewe mbere ibahasha yo kubasahiriza mu kwitunganiriza imigambi.

Ikintu cakiriwe neza cane, ariko ikitamenyekanye, ni uko iyo yoba ari ingurane canke ingabire. Ariko uko biri kwose, kugira ihangiro uwo mwiherero wihaye rishikweko, hariho ibitegerezwa kwitonderwa kugira Reta ntizosange yasheshe itagishobora kuyora.

Urwiganwe rw’abandi

Ukwigana umugambi wa naka ngo ni uko wamuteje imbere, ni indwara yeze mu rwaruka rwitunganiriza imigambi. Twihweje ivyashitsweko mu mwiherero, ibijanye n’uburimyi ni vyo vyashizwe imbere. Mu gihe bose bokora bimwe, canke bakigana ivyahahora, nta nkeka ko umwimbu uzogwira, ariko ntibizoborohera kuvyaza umusaruro ngo ayo mahera asubizwe.

Eka no mu bindi bisata ni uko. Ayo mafaranga rero agatangura gukoreshwa gutyo, amaherezo azozimangana, ntasubizwe kandi na nyene kuyahabwa ntamugirire ikimazi.

Amategeko n’imigenderanire

Nk’abazoshira imitahe mu kurima ivyamwa, hari ingingo nyinshi zibuza nk’akarorero gushora ivyamwa canke umwimbu w’igihugu hanze y’igihugu. Ivyo na vyo bizotuma bataronka isoko, gutyo basange umwimbu urabononekaranye. Vyongeye, mu gihe hazoba hubatswe amahinguriro yo kubihingura, ibihano bimwebimwe vyafatiwe igihugu, tutibagiye imigenderanire icumbagira n’ibihugu bimwebimwe bibanyi, bizotuma hari amasoko mpuzamakungu dushobora kutazoshikanako umwimbu wacu. Ni co gituma, hambavu y’itangwa ry’ayo mahera, abajejwe intwaro bogerageza igihugu kikaba gucuditse n’ababanyi bose, hakaronderwa amasoko yo gushorako ibizoba vyavuye muri iyo migambi.

Kwiga imigambi

Umugambi uratandukanye cane n’icipfuzo. Kubera ubwinshi bw’ayo mahera, ni benshi bazozana imigambi. Hari abazoba bayize neza, n’abazopfa gupfundikanya kugira ayo mahera ntabacike. Kenshi, uwugize iciyumviro, aca ashaka kugishira mu ngiro ubwo nyene, kumbure atanacanditse ngo akigire umugambi wubatse neza. Aho rero ni ho abazoba bajejwe kwemeza iyo migambi bakwiye kugabira. Bakirinda ibiturire n’ikimenyane, bagashira imbere ineza y’igihugu.

Bibaye ngombwa, hotunganywa inganda zo kwigisha kwandika imigambi mu buryo bwiza ku bazoyahabwa ; hari amashirahamwe atari make abifisemwo uburambe. Imbere yo kubaha amafaranga, bobanza bakabaha inyigisho zikwiriye.

Iyigwa neza ry’imigambi ritagira amakemwa, ni ryo rizofasha kugira ayo mahera ahabwe ababikwiye, ndetse akagirira akamaro abayahawe, n’igihugu cabibarutse.

Ugukurikiranwa

Ibice biri hagati ya 30 na 60 kw’ijana vy’imigambi yakiriwe n’ikigo API, yapfuye ariho ikivuka. Ibice 80 kw’ijana na vyo vy’amashirahamwe, apfa haheze imyaka itatu. Aho rero ni ho hokugabira, ntitube nka ya nka yavyara mu ci ati: “Ahanje ndahejeje hasigaye ah’umwungere.” Iyo migambi ikurikiranywe neza, ayo mafaranga azoshurika maze ivyamwa vyayo bigirire neza beneyo hamwe n’igihugu cose.

Ni ivy’ukuri, ukwitunganiriza imigambi ni yo nzira yonyene ishobora gutorera inyishu irama ikibazo c’ikena ry’akazi mu Burundi. Ariko ivyo bintu tuvuze aho hejuru bifashwe minenerwe, tuzosanga twasereye mu ruzi.