#ZaNzoga: “nagukunze nkiri muto, none umpemukiye gutyo ?”

Akayoga uyu mwanditsi yanyoye, yagahaye urukundo rwose, nk’uko yoruha umwana w’umuntu. Ivy’urwo rukundo, ntivyagenze uko yari avyiteze. Ari kwo kwandikira aka kabaruwa uwo “mukunzi” wiwe. 

Kayoga nanyoye,

Vyatanguye nkiri umwana muto cane: imisi yose, ukama wikurikiza data na mama, mugatahana bugorovye i muhira iwacu. Wari mwiza cane, nkabona usa n’uwufise utubiri twompi, nanje nkakumvira igishika n’ibishobisho bidashira, nkumva nshatse kugusoma. Data na Mama ntibigeze bambera intambamyi, bakandeka nkagusomagura, ngo “ndekera umwana yinezereze”; ntibamenye ko ndiko nishora ku risongoye.

Ntivyatevye, ngera mu buyabaga. Ico gihe co, urukundo rwanje nawe ruhinduka urw’ibisazi. Hagati yawe n’ikindi kintu cose, nama nsanga naguhaye ikibanza ca mbere; ubona ko kwuzura nawe nabibona nk’ibimpa agaciro kadasanzwe. Akatari gake, sinatinye gusiba kw’ishure, kuko hari umugenzi andiye akara ngo twinyavye, tukurabe. Buri mugoroba, uribuka ko ntigeze nsiba isango ryanje nawe, haba “ku kadirisha” canke ahandi hose twohurira.  

Aho undushirije akenge, nasanze abo waboheye mu rukundo rwawe atari jewe gusa. Ku vyapa ku mabarabara, ku mboneshakure n’amaradiyo, mu bisagara no mu mitumba, imitima y’abakuru n’abato warikarurukirije. Nta n’umwe ashoboye kwibaza ko hari ikibi wokora, ariko uza waramaze kudukomeretsa, kuko uziritse imitima yacu twese. Tugukunda tutiziganya, nawe ukadusinzikaza mu kayombekere, umwe ku wundi, ntitubice n’ikanda. 

Warambabaje

Ngo “iyo menya” yama iza ibipfa vyapfuye. Ntiwanzigamiye akabanga. Nagukunze n’umutima wanje wose, nawe ntiwita kuri urwo rukundo nakweretse, uratabagaza ubuzima bwanje. Sinigeze menya, hakiri kare, ko kugusoma nkiri muto bigira ingaruka ku bwonko bwanje, kuko na none butari bwakure. Nawe ntiwahengeshanya kubutabagaza. 

Kubera iki wamariyeko utwanje? Igihe cose nakweretse abagenzi, nkagira ngo ndiko nkomeza ubucuti, sinigere mbona ko uriko undirako utwanje, umbuza kuziganiriza kazoza ngo “reka ngusome nkikuronse hafi, ejo nzobunga urundi”; simenye ko ngiye kwicwa n’agahoraho. 

Waranciye agatete, none ubu ndi agatwengo aho nciye hose. Ndibuka, ngitangura kugusoma, ntaco vyari bintwaye ko ndakuronka canke ndakubura, ntivyambuza gusinzira. Buhorobuhoro uranca wahiba, ungira akarimarirenze, ubu singitora agatiro ntakubonye. Aho utereye ingorane, ntaco uriko urakora ngo umvure ico gikomere c’akaronda wasize mu mutima wanje. Ahubwo, witayeho guhumvya abakiri bato, ngo bikunde nabo ubashikaneyo nk’uko wangize. 

“Zihotorwa ziboroga”

Genda, uri nyamugira umusore umusega, ukagira inkumi inkungu. Abobara neza inkuru yawe, ni abigeme wasinzirije ngo urabanezereje, bikangura batakizambaye, bukeye kabiri bisangana imbanyi batifuje. Imisore wasutse ngo ubagize abagabo bakiri imiyabaga, ubasunikira gucudika n’ibindi biyovyabwenge, ubu kazoza barabaza. Nko gufata umugabo w’ijunja n’ijambo, ukamugira agapfagabo, kamwe karangwa n’ugukubita umugore n’abana, canke gusinda ku gahinga; genda uri uw’isoni nke!

Iyo mba umutegetsi, nogufatiye ingingo, nkakugerera ibibanza ufise uburenganzira bwo kubamwo, ingene abagukeneye bari bugushikire, canecane nkakurinda ibibondo, kuko nawe ntugira n’ikizira. Wakira abakwizaniye bose, amasaha ayo ari yose, mu kibanza ico ari co cose, uwukwihebeye ukamutabagaza, ukamuca iyondoyondo. 

Kayoga nanyoye, abandi barakundana bikavamwo ibibondo, itunga n’umunezero; ugukundana nawe bimviriyemwo umubabaro, indwara n’ubupfu. Nzokuvuga uko nakubonye, ko uri uwo twagendanye tugenzanya, nza kubimenya ataco nkirokora.