Mu ntumbero yo gushira mu ngiro ivyasabwe n’umushikiranganji w’umutekano, intwaro yo hagati mu gihugu n’iterambere rusangi vyerekeye guhana amasengero atubahiriza amategeko, musitanteri wa komine ya Kayanza Gilbert Nyandwi yerekanye, kuri uyu wa kane, amasengero 23 agiye kwugarwa n’ayandi 6 agiye gucibwa ihadabu ry’amafaranga y’amarundi 20 000. Bene ayo masengero bati: “Ni akarenganyo”.
Muri ayo masengero 23 afise amakosa yotuma yugarwa, harimwo 13 yagirizwa kutubahiriza imetero hagati yayo n’ayndi yubatswe hafi yayo. Abiri yagirijwe kuba akorera mu nzu z’ubudandaji, imwe yagirizwa gukorera mu nzu y’amanama, iyindi ya mu nyubakwa itabereye, iyindi mu nzu yo kubamwo.
Hari n’iyindi yagirizwa gukorera mw’ishure, iyindi mu kabare, iyindi hagati y’ububare bubiri kandi mu nzu ishaje inubakishije ivyondo. Zibiri zagirijwe kuba ziri ku mitumba imwe n’ubucimbiri bumwe kandi zegamiye amadini amwe. Muri zitandatu zishobora gucibwa ihadabu, ane yagirizwa kuba adafise isuku rikwiye, nazo zibiri zikaba zidafise utuzu twa surwumwe dukwiye.
Umubabaro mu barongoye amashengero
Bamwe mu barongoye amashengero canecane abagirizwa kutubahiriza umwanya hagati yayo nayo yasanze aho yubatse, bavuga ko batumva ingene bokorwako n’itegeko ryaje baramaze kwubaka, ni ukuvuga mu mwaka wa 2014.
Uwo mwana, ku wa 31 Kigarama, hasohotse itegeko ry’umukuru w’igihugu, mu ngingo yaryo ya 35, ritegeka ko mu gisagara hagati y’isengero n’irindi hategerezwa kuba n’imiburiburi imetero amajana atanu nayo mu mitumba hakaba ikirometero.
Abandi bavuga ko ikirere hagati y’isengero n’irindi capimwe atariho bari bagashikiriza amakenga ko imetero zisabwa hagati y’isengero n’irindi babikwije, bagasaba ko abapimye bozogaruka gupima.
Barashobora gusaba kurenganurwa
Ayo masengero yose uko ari 29, musitanteri wa komine Kayanza yayahaye ikiringo c’indwi imwe gushika ku musi wa kane w’indwi iza kugira ababona bararenganijwe biture komine bayereke aho barenganijwe maze barenganurwe.
Yongeye amenyesha ko amasengero azokwugarwa, abayarongoye bashobora kuzoca barondera ibibanza ahandi habereye, babanje gusaba impanuro n’intumbero muri komine kugira ntibasubire kugwa mw’ikosa. Ikindi naco, ni uko kuva ubu, imbere yuko ishengero rikorera muri komine Kayanza rizobanza kwerekana ubushobozi afise bwo gukora imigambi y’iterambere nko kwubaka amashure canke amavuriro imbere yuko bubaka amasengero.
Twobibutsa ko ku wa mbere Ntwarante uyu mwaka, umushikiranganji Gervais Ndirakobuca yanditse ikete asaba ko amasengero akora adafise uruhusha, ayakorera ku mpusha z’ayandi, ayatubahiriza imetero zisabwa hagati yayo n’ayandi, ayakorera mu mashure canke mu mabare canke mu nzu z’amanama yokwugarwa ubwo nyene. Yasaba kandi ko ayatubahiriza amategeko y’isuku, ayavuza ivyuma mw’ijoro, ayatubahiriza amasaha yo gusenga nayo ko yocibwa amahadabu maze abandanije akugarwa.
Mwomenyako muri komine Kayanza, hari amasengero 150, hakaba hari n’imitumba ifise amasengero arenga 10 nk’uko bimenyeshwa na Désiré Nimbona, umuhanuzi wa musitanteri wa komine Kayanza ajejwe ivy’inyubako.