article comment count is: 0

Bujumbura : uwiteze gusubira kubona ipikibiki mu gisagara hagati nazeruke !

Ubuyobozi bw’igisagara bugifata ingingo yo kubuza amapikipiki gushika hagati mu gisagara ca Bujumbura vyarumvikana cane kuko vyari bivuye ku mvo z’umutekano muke waharangwa. Yamara rero ubu izo mvo ntizikiriho ariko iyo ingingo iracakurikizwa. Muti biva kuki none ? Twaregereye inzego zibijejwe. Ni inkuru ya nyuma muri rwa ruskurikirane.

Abunguruza abantu ku mapikipiki baripfuza kuronswa uruhusha rwo gusubira gushika hagati mu gisagara.  Kanatsinda, imvo z’uko abo bunguruza abantu ku mapikipiki boba batwara inkozi z’ibibi zitera umutekano muke mu gisagara ntazikihari. Ubu rero, amashirahamwe yabo aramaze kwitura inzego z’igihugu kugira iyo ngingo ikurweho canke isubirwemwo, babone gusubira mu mwidegemvyo nka kera, yamara nta cavuyemwo. Abo rero ngo bahawe izindi nsiguro.

Ingorane iri ahandi

Nsabimana Jadot, umukuru w’ishirahamwe ry’abo bunguruza abantu bakoresheje amapikipiki, avuga ko amaze kwitura ubushikiranganji muri iyo ntumbero. Agira ati : « Aho twasaba urwo ruhusha, twaribukijwe ko ugushika mu gisagara hagati ku mapikipiki bitera amasanganya cane mu mabarabara. Ivyo navyo bikava ahanini ku kuntu benshi mu bayagendesha ata mpusha zo kugendesha ayo mapikipiki baba bafise». Uwo murongozi akavuga ko iyo mvo yaciye ituma batangura kwigisha abatwara amapikipiki ibijanye n’amategeko yo mw’ibarabara kugira barabe ko iyo ntambamyi yovaho. Ico gikorwa kikaba kimaze umwaka, nk’uko abandanya abitumenyesha.

Yamara rero, ngo hariho ikindi coba catumye abo bagendesha amapikipiki yunguruza abantu batemererwa gusubira gushika mu gisagara hagati. Uwo avuga ati : « Benshi mu bagendesha amapikipiki boba batarishe, kuva mu mwaka w’i 2015, amafranga atuma baronswa za mpapuro basabwa mu mabarabara, na cane cane rumwe rwerekana ko ingendeshwa yasuzumwe neza ko ikomeye ». Ivyo rero bikaba vyatumye baca baheranira amafaranga menshi igisata gitanga izo mpapuro mu bushikiranganji bwo gutwara abantu n’ibintu ari nabwo buzitanga.

Uwo atwara iryo shirahamwe ry’abagendesha amapikipiki ntabihakana ariko agasigura ko ivyo birarane bitabavuyeko. Ngo vyoba vyavuye ku mutekano muke kuko amabarabara atahita. Akaba asaba ubushikiranganji bujejwe gutwara abantu n’ibintu ko bokwumvikana, maze bagahuriza ku mafaranga botanga, gutyo ingorane zigahera, bagasubira gushika hagati mu gisagara.

Ivy’uko abatwara amapikipiki boba bamwe bamwe bakoreshwa mu busuma iyo bwije, Nsabimana Jadot arabihakana. Ati : «Ivyo vyarahagaze kuva kera. Kuva dutanguye gutwara ishirahamwe, ni vyo twaciye twihutira gutorera inyishu». Akemeza ko «abasuma benshi bafashwe baratabwa mu mvuto, ubu bari mu munyororo mu Mpimba». Yamara abibwa bo ntibasiba kwibwa.

Umuzi w’ibuye

Bankibirwira Roger, umukuru w’igipolisi kijejwe umutekano mu mabarabara, arabakurira inkoni ku gishitsi : « Ingingo ibuza abunguruza abantu ku mapikipiki gushika hagati mu gisagara irafasha cane kugira uruja n’uruza hagati mu gisagara rumere neza. Nayo abafatira ku kuntu igisagara gitekanye, ijambo umutekano rifise insiguro nyinshi. Ni vyo nta bariko baradurumbanya umutekano biciye mu bugizi bwa nabi. Ariko, mu gihe uruja n’uruza rwoba rutameze neza n’uwo woba ari umutekano uhungabanye ».

Mu guheraheza, uwo ajejwe umutekano mu mabarabara yemeza ko no mu yandi makungu, atari henshi bacemerera abunguruza abantu ku mapikipiki n’amakinga gushika mu bisagara bikuru. Ngo n’aho bakibikora, nko mu gisagara ca Kampala mu gihugu c’Ubuganda, ntiborohewe. Ni uko rero, « uwufise amazinda nashire ! »

 


Soma kandi : Amapikipiki muri Bujumbura : ubusuma, ukutarenga ibiraro, ibibazo nkoramutima

Partagez-nous votre opinion

Nous utilisons des cookies pour vous garantir la meilleure utilisation sur ce site web.

En poursuivant votre navigation sur ce site, vous acceptez l'utilisation de cookies. Si vous souhaitez en savoir plus sur les cookies que nous utilisons, veuillez lire notre politique relative aux cookies.