“Gukorera Zabera”: iyo vyaturutse

Ni benshi mu Barundi bakoresha imvugo ngo “kanaka yakoreye zabera”, canke mu kuramukanya ukumva bagira bati: “ndabutakamvye nyakubahwa”. Ariko si bose bazi iyo vyazananye. Ndereyimana Félix arabituyagira.

Ni ku gacimbiri Gisabazuba, umutumba Remera, zone ya Nyabitanga muri komine ya Gishubi y’intara ya Gitega. Ni ahahoze hari ikirimba c’umuganwa yitwa Nzirarusha, maze uno akagira umuganwakazi wiwe yitwa Zabera.

Inkuru y’uwo muryango rero irazwi cane muri ako karere nsanzwe nturukamwo, ariko nagiye gutangazwa n’ugusanga Abarundi batari bake batazi aho iyo mvugo yo “gukorera Zabera” yazananye. Ariko nka bose barayikoresha. Kandi barazi ko bisigura “gukorera ubusa”.

Aho hambere hahise

Umuganwakazi Zabera yabayeho ku ntwaro ya cami, ariko yararamvye cane, kuko jewe ubwanje naramwiboneye, mu myaka y’1980 ishira iy’1990. Wa mugani ngo “inkuru y’inkuba woyibarirwa n’uwo yahushije”, ukeneye kumenya neza amakuru y’uwo Zabera, wokwegera abantu bakomoka mw’iyo ntara, ariko bafise kuva ku myaka mirongo itanu.

Nk’uko vyahoze kuri cami, Abarundi barakuranwa kuja gukorera umuganwa canke umwami. Ni ko vyagenda rero no kwa Zabera, abanyagishubi baraja kumukorera. Abagore n’abakobwa bakaja gukubura, guteka n’ukuzimana umuganwakazi, nayo abagabo n’abahungu bagaca ibiti canke bagasobanya urugo n’ibindi.

Uwugiye gukora kwa Zabera wese rero, vyari bizwi ko aramutse agenda atitekereye impamba, yirirwana ikigoyi. Uyo muganwakazi yari yaragize umuziro icitwa guhemba canke gushimira abakozi biwe. Ndetse n’amavoka akorotse ku biti vya Zabera, cari ikizira ko umukozi yoyatora ngo ayihembuze. Uwabirengako yarakubitwa akagoka. Noneho uwuvuye gukora iwe wese, agataha yikoreye amaboko, ataco atahanye. Ni aho rero ahavuye iyo mvugo ngo “gukorera Zabera”.

Erega n’ukumuramutsa ntivyari bisanzwe

Igihe uwo muganwakazi yari akiriho, abavyeyi bose barigisha abana babo ukugene bari buramutse uwo mwubahwa, igihe cose bohurirana. Bagira bati: “ukabona uhuye na Zabera, uzoce upfukama, uhungabanye ikiganza uti: ndabutakamvye nyakubahwa”, hanyuma ubandanye. No ngaho nyene, yarashobora kukwishura canke akareka. Iyo ugize Imana akakwishura, yaraguha ukuboko, ariko nawe waba uzi k’utegerezwa guca uhambira impuzu ku kiganza cawe, ukamuramutsa. Carazira k’umubiri w’umunyagihugu ukora ku mubiri wa Zabera. Ni no ngaho nyene havuye indamutso ya “ndabutakamvye nyakubahwa”.

Articles récents

Recent Comments ( 2 )

  1. iyo nkuru ndayizi mu mugamba ku banyagihugu bakora mw’ibarabara hama hafi yabo hari umunyokuru yitwa zabera akabakopera inzoga y’amahonda. Hageze umwisho umugapita yabanza gukuramwo aya zabera. Uwusanze hasigaye dukeya canke intica ntikize agaca avuga ati : « Nakoreye Zabera basha »

Say your opinion

Votre adresse de messagerie ne sera pas publiée. Les champs obligatoires sont indiqués avec *

*