Uburundi bwoba bukwiye gusezerera umugenzo wo gutanga inkwano?

Umugenzo wo gukwa uzwi nk’ugutanga agashimwe ku bavyeyi b’umukobwa. Ariko uko imisi igenda, akamaro n’agaciro k’uwo mugenzo bigenda bigirwako impari na cane cane mu rwaruka.  Spageon Ngabo aratubwira uko bamwe bamwe babibona.

Hari inkuru iheruka gutangazwa n’ikinyamakuru c’Abongereza BBC, ivuga ku mushingwamanza w’umupfasoni mu gihugu ca Zimbabwe aheruka kwitwara imbere ya sentare yubahiriza ibwirizwa shingiro muri ico gihugu, asaba ko umugenzo wo gukwa wokurwaho.

Abarundi barenga amaja ane bakaba baragize ico bavuga kuri ico ciyumviro babicishije ku rubuga Yaga. Bamwe bakaba bashigikiye uwo mushingwamanza, abandi bakavyamirira kure.

Yamara rero wihweje insiguro iyo mirwi yompi itanga, ikibazo kiguma kigaruka ni mbega none inkwano ikwiye gukurwaho canke ibintu vyoguma uko biri ?

Bati : « niveho kuko ni amananiza »

Wenceslas Gatogato ati « Iciyumviro c’uwo mushingwamanza ni co basi. Kuko uwakowe umengo aba agurishijwe».

Appolinaire Ntawumbabaye we asaba ko inkwano yokurwaho koko. Ati “erega twese ntitwikwije. Uzi ko hari nuwushaka kurushinga aho aba araho apanze, none nk’uwo yokwa ayo akuye he? Ahubwo iciza ni uko vyovaho”.

Donatien Sindayikengera we abona ko abakobwa nyene ari bo bari bakwiye gusaba ko inkwano zokurwaho, kuko ngo zivuna ababa babakunze. Ati “Ica mbere niveho. umuhungu ntiyokwivuna ngo aratanga menshi, kuko ni we azosigara arahangayika mu gutunga uwo mukobwa. Umukobwa rero ntakwiye gutangisha umukunzi wiwe inkwano, kuko niwe ahindukira akabaho nabi.”

Yamara hari abatatavyumva uko

Eliane Minaj asa n’uwishura abo avuga ati: “Ubwo ni ubukene bubatuma mutinya inkwano. Gukwa si ukugura kandi si ukugurisha. Ni agashimwe gahabwa umuvyeyi, kandi tubiravye neza na we nyene ntaco gaheza ngo kamumarire, kuko kagaruka kuri bene kurushinga.” Muti gute none kabagarukako? Jeanine Kaburente aramwitsa ati “barahindukira bakayatwikuruzamwo . Nayo ahandi nta woronka ikiguzi c’umwana watwaye mu nda amezi icenda”.

Ni kuki none habamwo uguciranira?

Amategeko n’amateka agenga igihugu c’Uburundi yo yemeza ko inkwano atari ngombwa ngo itangwe. Itegeko rigenga ingo n’imiryango rirabitomora neza, mu kuvuga mu ngingo yaryo ya mirongo icenda na gatatu ko “atari ngombwa ngo habe hatanzwe inkwano kugira ubugeni bwemerwe”.

None abo basaba ko inkwano yokurwaho n’amategeko babikura kuki? Ubwo ntikwoba ari ukutamenya ico amategeko avuga ? Canke ni kwa kundi hari abantu bakora ibintu ngo ni uko babonye no kwa naka vyagenze kuriya? Uko biri kwose, mu gihe ca none, simbona ko inkwano yari ikwiye kuba icobuza abashimanye kurushinga, na cane cane ko ubuzima bw’inyuma y’ibirori vy’ubukwe ari bwo buhambaye gusumba imanza nyezina.